最近無線電視的溏心風暴熱爆，大細契日日上雜誌封面，司棋姊菊英姊風頭一時無兩，大台始終是大台，一套劇集可以令息影多年的菊英姊紅遍省港澳，有名自然有利，相信未來一年細契又可以賺返一千幾百萬了。這是無線的魅力，錢唔係賺無線嘅，係賺出面 market 嘅，無線只是一個平台，各取所需而已。
我可沒有這福氣能看到溏心風暴，不過在深夜時卻有幸重溫韓劇 《天國的階梯》 ，其實韓劇劇情非常老套，基本上是白燕張活游現代版而已，但俊男美女、華衣美服、名車配豪華場景 …. 重新包裝又有唔同睇法。這套劇集兩三年前我已買了整套 DVD ，用幾晚通宵一口氣煲完。 ( 有好嘢大家分享，歡迎千草病友借用觀看，幾好睇嫁！ )
《天國的階梯》 男主角車成俊固然情深款款，有肩膊有胸襟，夠努力肯承擔，但韓靜書又悲慘得太過份，硬要賺人眼淚。不過，蹺唔怕舊， pack 得好就掂啦，而家 D products 講包裝，〔滿城盡帶黃金甲〕味又係一樣舊蹺翻新啫？
劇中我最喜愛是車成俊的跟班，那洋鬼子張理事，呢個張理事簡直係各位老闆夢寐以求的好幫手：忠心耿耿，隨傳隨到，辦事妥貼，可以做司機，可以幫手追女仔，又可以幫老闆擋駕討厭的韓友莉，老闆落難時又有情有義氣，醒個豐富晚餐俾老闆嘆下；最利害係最後仲可以為成俊同靜書做埋證婚人添， D 韓國佬真係用到盡呢個鬼佬，唉！咪以為鬼佬就係神父，證婚人唔係隨便搵個阿四都做得嫁！韓國人做 MP3 ，做手機就叻，拍劇集都要同無線學吓嘢先得。不過，呢個張理事又真的好可愛嫁。
千草高薪聘請類似張理事的人才，妳覺得自己掂就打電話黎見工啦。
姊妹們咪以為做戲先至有咁偉大嘅愛情，一個靚仔有錢嘅大集團接班人會娶個已經失明嘅女人做老婆。其實；係我地身邊每日都有好多動人的愛情故事發生的，妳要用心去聽，用心去感覺才會發掘到的…關心一下妳周邊的朋友，少 D 睇 5 行 3 保啦。
我最近就認識到幾對 Couple ，她們的愛情故事非常感人 … 她們對愛情持久的付出與頑固的執着 … 實在令人敬佩，誰說女人只拜金？
「在天願作比翼鳥，在地願為連理枝」 …… 祝福妳，真摯的祝福妳倆永遠生活愉快。
妳是香港女人的驕傲！ |
